Sviðslistamiðstöð
Austurstræti 5, 4. hæð
101 Reykjavík
Iceland
©2022 Sviðslistamiðstöð
Handbókin er ætluð umsækjendum í Sviðslistasjóð. Hér eru teknar saman helstu upplýsingar um umsóknarferlið, matsviðmið, fjárhagsáætlanir og ráð sem geta styrkt umsóknina. Efnið byggir á fræðslukvöldi Sviðslistamiðstöðvar og ráðgjöf sérfræðinga, framleiðenda og fyrrverandi fulltrúa í Sviðslistaráði.
Bestu umsóknirnar verða sjaldnast til síðustu dagana fyrir umsóknarfrest. Þegar hugmynd fær tíma til að þróast verða textar skýrari, áætlanir raunhæfari og verkefnið sjálft sterkari heild.
Umsóknin er umfangsmikil og tekur tíma í vinnslu. Byrjaðu snemma svo nægur tími gefist til að þróa hugmyndina, vinna fjárhagsáætlun og safna saman fylgigögnum.
Sviðslistaráð metur umsóknir út frá fyrirfram skilgreindum matsviðmiðum. Góð umsókn hjálpar ráðinu að svara þeim spurningum sem liggja til grundvallar matinu.
Ef erfitt reynist að lýsa verkefninu í einni eða tveimur setningum er það oft merki um að hugmyndin þurfi frekari mótun. Reyndu að skilgreina kjarnann áður en þú ferð í ítarlegar lýsingar.
Þegar sótt er um í Sviðslistasjóð er jafnframt hægt að sækja um listamannalaun fyrir þátttakendur í verkefninu í sömu umsókn. Umsóknin er metin samhliða af Sviðslistasjóði og Launasjóði sviðslistafólks. Því er mikilvægt að setja fram heildstæða mynd af kostnaði og tekjum verkefnisins.
Veitir framleiðslustyrki til sviðslistaverkefna.
Styður vinnuframlag listafólks með starfslaunum.
Með umsókn í báða sjóði fær Sviðslistaráð aukið svigrúm til að styðja verkefnið með þeim hætti sem hentar því best.
Aðeins að sækja um listamannalaun? Ef þú sækir ekki um framleiðslustyrk en vilt sækja um listamannalaun skaltu nota sérstaka umsókn á island.is/listamannalaun
Umsóknarferlið er umfangsmikið og krefst undirbúnings. Gefðu þér góðan tíma til að fylla út umsóknina, safna saman fylgigögnum og yfirfara allar upplýsingar áður en umsókninni er skilað.
Opnaðu umsóknarkerfið tímanlega og skoðaðu uppbyggingu umsóknarinnar áður en eiginleg vinna hefst. Farðu yfir reitina, kynntu þér hvaða upplýsingar og fylgigögn þarf að leggja fram og fáðu tilfinningu fyrir umfangi umsóknarinnar.
Settu fram allan kostnað og allar tekjur verkefnisins. Ekki reyna að laga fjárhagsáætlunina að mögulegri úthlutun eða reikna listamannalaun sérstaklega inn í hana. Byrjaðu á raunverulegri mynd af verkefninu.
Launakostnaður er oft stærsti kostnaðarliður verkefnisins. Notaðu raunhæfar forsendur og skráðu þann kostnað sem verkefnið krefst í raun.
Þegar launakostnaður hefur verið skráður er hægt að velja hvaða þátttakendur sækja um listamannalaun. Með því skapast meira svigrúm til stuðnings við verkefnið.
Ferilskrár allra þátttakenda skulu fylgja umsókn í einu PDF-skjali. Mikilvægt er að yfirfara öll fylgigögn vel áður en umsókn er send inn.
Umsóknarkerfið vistar ekki sjálfkrafa. Mundu að vista hverja síðu áður en þú heldur áfram.
Almennt er mælt með að sótt sé um styrki undir kennitölu félags eða annars lögaðila fremur en persónulegri kennitölu. Það getur einfaldað umsýslu og skýrt betur fjárhagslega umgjörð verkefnisins.
Hefja umsókn? Opna umsóknarkerfi Rannís →
Við mat á umsóknum horfir Sviðslistaráð til þriggja meginþátta. Veitt eru stig á skalanum 0–10 og vægi þáttanna er sem hér segir.
Styður verkefnið við þróun og eflingu sviðslista?
Bætir verkefnið við fjölbreytni í sviðslistalífinu?
Hverjum er verkefnið ætlað og hvernig nær það til þeirra?
Felur verkefnið í sér nýjar hugmyndir, aðferðir eða nálganir?
Er verkefninu lýst með skýrum og skiljanlegum hætti?
Er framvinda verkefnisins raunhæf og vel skipulögð?
Endurspeglar kostnaðaráætlunin raunverulegt umfang verkefnisins?
Hvaða verk og verkefni liggja að baki?
Hvaða faglegu og listrænu reynslu býr hópurinn yfir?
Er hópurinn að hasla sér völl með áhugaverða umsókn?
Þessar spurningar endurspegla það sem Sviðslistaráð horfir til við mat á umsóknum. Góð umsókn hjálpar ráðinu að sjá gildi verkefnisins, styrkleika þess og hvernig það verður að veruleika.
Fjárhagsáætlun er ekki aðeins yfirlit yfir kostnað. Hún er verkfæri sem hjálpar þér að móta verkefnið og sannreyna hvort það sé raunhæft í framkvæmd.
💡 Jarðtengdu hugmyndina. Fjárhagsáætlun hjálpar þér að svara mikilvægum spurningum:
Hversu margir koma að verkefninu?
Hversu mikinn tíma tekur undirbúningur og æfingar?
Hvað þarf að kaupa eða leigja?
Hvernig nær verkið til fólks?
Reiknaðu raunhæf laun og annan kostnað. Miðaðu við gildandi taxta eða sambærileg viðmið (t.d. frá FÍL) þegar það á við. Laun sem endurspegla ekki raunverulegt vinnuframlag geta dregið úr trúverðugleika umsóknarinnar.
Styrkir eru ekki alltaf greiddir út í einni greiðslu. Hluti styrksins getur verið greiddur eftir að verkefni lýkur og lokaskýrslu hefur verið skilað. Taktu mið af því við gerð fjárhags- og framkvæmdaáætlunar.
Geymdu reikninga, kvittanir og önnur heimildaskjöl jafnóðum. Við uppgjör þarf að vera hægt að sýna fram á kostnað verkefnisins.
Helstu ráð sem komu fram á fræðslukvöldi Sviðslistamiðstöðvarinnar um umsóknir í Sviðslistasjóð.
Gerðu strax grein fyrir verkefninu. Ekki láta lesandann giska á hvort um sé að ræða danssýningu, leikverk eða annars konar sviðslistaverkefni.
Geturðu útskýrt verkefnið í einni eða tveimur setningum? Ef ekki gæti hugmyndin þurft frekari mótun.
Útskýrðu hvers vegna þú eða hópurinn ert vel til þess fallinn að vinna verkefnið og koma því til framkvæmda.
Sýndu hvernig verkefnið fellur að markmiðum og áherslum þess sjóðs sem sótt er um í.
Hvort sem um er að ræða laun, aðkeypta þjónustu eða markaðskostnað skaltu sýna að fjárhagsáætlunin byggi á raunhæfum forsendum.
Lestu umsóknargögnin vel, svaraðu öllum spurningum og gakktu úr skugga um að fylgigögn séu á sínum stað.
Verið sértæk í lýsingum í stað þess að styðjast við innantóm lýsingarorð.
Fáðu utanaðkomandi aðila til að lesa umsóknina. Of margar athugasemdir geta þó gert textann ómarkvissari.
Bestu umsóknirnar verða sjaldnast til á síðustu dögunum fyrir umsóknarfrest. Gefðu verkefninu tíma til að þróast.
Umsóknarferlið getur hjálpað til við að skýra hugmyndina, styrkja verkefnið og móta næstu skref. Þótt styrkur fáist ekki strax nýtist vinnan við næstu umsókn eða næsta tækifæri.
Að byrja of seint og skila á síðustu stundu
Að lýsa verkefninu óskýrt eða fela kjarnann í löngum inngangi
Að gera óraunhæfa eða of lága fjárhagsáætlun
Að sýna ekki hvernig verkefnið fellur að markmiðum sjóðsins
Að vanmeta vinnuframlag þátttakenda
Að senda umsókn án yfirlestrar
Handbókin byggir á fræðslukvöldi Sviðslistamiðstöðvar um umsóknir í Sviðslistasjóð. Efnið dregur saman ábendingar frá Óskari Eggerti Óskarssyni hjá Rannís, Ólöfu Ingólfsdóttur, fyrrverandi fulltrúa í Sviðslistaráði, og Ragnheiði Maísól Sturludóttur hjá Murmur Productions, auk umræðna og reynslu sem deilt var á viðburðinum. Efnið er ætlað sem leiðarvísir en kemur ekki í stað leiðbeininga og reglna sem birtar eru af Rannís.
